Дар Академияи идоракунии давлатии назди Президенти Ҷумҳурии Тоҷикистон маросими ифтитоҳи курси такмили ихтисос барои муовинони раисони кумитаҳои идораи замини вилоятҳо ва шаҳру ноҳияҳо дар мавзӯи «Истифодабарии самараноки замин ва нақши он дар таъмини амнияти озуқаворӣ» баргузор гардид.
Дар маросими ифтитоҳи курси мазкур ноиби якум, ноиби ректор оид ба таълим Рашидов Ҷамшед, муовини якуми раиси Кумитаи давлатии идораи замин ва геодезии Ҷумҳурии Тоҷикистон Каримзода Азизмад, директори Донишкадаи такмили ихтисос ва бозомӯзии касбии хизматчиёни давлатии Академия Ҳамидов Шоҳрух, намояндаи Агентии хизмати давлатии назди Президенти Ҷумҳурии Тоҷикистон ва шунавандагони курси такмили ихтисос иштирок намуданд.
Чорабиниро ноиби якуми ректор Рашидов Ҷамшед ифтитоҳ намуда, қайд дошт, ки истифодаи самараноки замин дар таъмини амнияти озуқаворӣ нақши калидӣ дорад. Замин як манбаи маҳдудест, ки бояд моҳирона идора карда шавад, то амнияти озуқаворӣ барои аҳолӣ таъмин карда шавад. Яке аз роҳҳои самаранок истифода бурдани замин истифодаи усулҳои устувори кишоварзӣ, аз қабили кишоварзии органикӣ мебошад, ки имкон медиҳад, ҳосилхезии хок нигоҳ дошта шавад ва таъсири манфӣ ба муҳити зист кам карда шавад. Инчунин истифодаи технологияҳои муосир ва равишҳои илмӣ барои баланд бардоштани ҳосилнокӣ ва сифати маҳсулот муҳим аст. Яке аз ҷанбаҳои калидии истифодаи самараноки замин дар Тоҷикистон ҷорӣ намудани технологияҳои муосири кишоварзӣ ва усулҳои кишоварзӣ мебошад. Ин истифодаи системаҳои самараноки обёрӣ, татбиқи механизатсия ва автоматикунонии равандҳои коркарди хок, инчунин истифодаи нуриҳо ва муҳофизати растаниҳо барои баланд бардоштани ҳосилнокӣ ва сифати маҳсулоти кишоварзиро дар бар мегирад.
Дар идома гуфта шуд, ки дар Тоҷикистон истифодаи самараноки замин дар таъмини амнияти озуқаворӣ ва рушди устувори кишоварзӣ нақши муҳим дорад. Кишвар дорои захираҳои маҳдуди замин аст, бинобар ин барои таъмини худтаъминкунии озуқаворӣ ва коҳиш додани вобастагӣ аз воридоти ғизо ин захираҳоро моҳирона идора кардан лозим аст.
Қайд гардид, ки баргузории курси мазкур ҷиҳати истифодаи беҳтар ва самараноки захираи замин ба шунавандагон донишҳои нави назариявӣ медиҳад.
Академияи идоракунии давлатии назди
Президенти Ҷумҳурии Тоҷикистон
